ប្រព័ន្ធស្ថិតិអត្រានុកូលដ្ឋាន

បណ្ណាល័យ គ.ជ.អ.ប

ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញជាអធិបតីក្នុងពិធីប្រកាសចូលកាន់មុខតំណែងអភិបាល នៃគណៈអភិបាលស្រុកកំពង់រោទិ៍

នាព្រឹកថ្ងៃព្រហស្បតិ៍ ០៧រោច ខែកត្ដិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៩ ខែវិច្ឆិកា ឆ្នាំ២០១៨នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញជាអធិបតីក្នុងពិធីប្រកាសចូលកាន់មុខតំណែងលោក សុច ពិសី ជាអភិបាល នៃគណៈអភិបាលស្រុកកំពង់រោទិ៍ ជំនួសឯកឧត្ដម សុខ រស់ ដែលត្រូវតែងតាំងមុខតំណែងថ្មីជាអភិបាលរងខេត្ត ស្របតាមអនុក្រឹត្យរបស់រាជរដ្ឋាភិបាល ។ ពិធីនេះរៀបចំនៅសាលប្រជុំសាលាស្រុកកំពង់រោទិ៍ ដោយមានវត្តមានអញ្ជើញចូលរួមពីសំណាក់ឯកឧត្ដមអភិបាលរងខេត្ត លោកស្រីនាយករងរដ្ឋបាលសាលាខេត្ត តំណាងកងកម្លាំងទាំងបី លោកប្រធានមន្ទីរ-អង្គភាព លោក លោកស្រីជាក្រុមប្រឹក្សាស្រុក គណៈអភិបាលស្រុក ប្រធានទីស្នាក់ការ និងនាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិព្រៃវលិ៍ល កម្លាំង និងសមត្ថកិច្ចឈរជើងនៅតាមព្រំដែន ប្រធានការិយាល័យ មន្ត្រីរាជការចំណុះសាលាស្រុកទាំងអស់ និងមេឃុំទាំង ១១ ក្នុងស្រុកកំពង់រោទិ៍ ។

មានប្រសាសន៍ក្នុងឱកាសនោះ ឯកឧត្ដមអភិបាលខេត្ត បានសម្ដែងនូវការកោតសរសើរ និងវាយតម្លៃខ្ពស់ ចំពោះក្រុមប្រឹក្សាស្រុក គណៈអភិបាលស្រុក មន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធ ប្រជាពលរដ្ឋនៅទូទាំងស្រុកកំពង់រោទិ៍ និងឯកឧត្ដម សុខ រស់ អតីតអភិបាលស្រុក ដែលនាពេលកន្លងមកបានខិតខំប្រឹងប្រែងយកអស់កម្លាំងកាយចិត្ត បំពេញតួនាទីភារកិច្ចប្រកបដោយការសាមគ្គីភាពក្នុងជួរគណៈអភិបាលស្រុក និងមន្ត្រីរាជការទាំងអស់ ធ្វើឲ្យស្រុកកំពង់រោទិ៍ សម្រេចបាននូវលទ្ធផលល្អប្រសើរទាំងការផ្ដល់សេវាសាធារណៈជូនប្រជាពលរដ្ឋ និងការថែរក្សាបាននូវសន្តិសុខ សុវត្ថិភាព និងសណ្ដាប់ធ្នាប់សាធារណៈ រួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចសង្គម និងកាត់បន្ថយភាពក្រីក្ររបស់ប្រជាពលរដ្ឋ ដោយឡែកចំពោះការតែងតាំងមុខតំណែងនៅថ្ងៃនេះ គឺជាដំណើរការរដ្ឋបាលធម្មតា ក្នុងការរៀបចំមុខតំណែងមន្ត្រីរាជការក្នុងមុខងារសាធារណៈ ស្របទៅតាមគោលការណ៍គ្រប់គ្រងរបស់រដ្ឋបាលថ្នាក់ក្រោមជាតិ ច្បាប់ និងលិខិតបទដ្ឋានគតិយុត្តជាធរមាន ។

ជាមួយគ្នានេះ ឯកឧត្ដមអភិបាលខេត្ត ក៏បានផ្ដាំផ្ញើនូវកិច្ចការសំខាន់ៗមួយចំនួន ដូចខាងក្រោម ៖
-ត្រូវពង្រឹងការសាមគ្គីភាព ឯកភាពផ្ទៃក្នុង និងពង្រឹងរបៀបរបបធ្វើការងារ
-ត្រូវខិតខំថែរក្សាការពារសន្តិភាព ស្ថិរភាពនយោបាយ សន្តិសុខសណ្ដាប់ធ្នាប់សាធារណៈ ការបង្ការទប់ស្កាត់ និងបង្រ្កាបបទល្មើសនានា
- ត្រូវរៀបចំធ្វើការបែងចែកតួនាទី ភារកិច្ច និងការទទួលខុសត្រូវក្នុងជួរគណៈអភិបាលស្រុកឲ្យបានច្បាស់លាស់
-ត្រូវយកចិត្តទុកដាក់គ្រប់គ្រងស្មៀនឃុំដែលស្ថិតនៅក្រោមការគ្រប់គ្រងរបស់រដ្ឋបាលស្រុក ឲ្យអនុវត្តបានត្រឹមត្រូវតាមតួនាទី ភារកិច្ចរបស់ខ្លួន
-ត្រូវពង្រឹងការគ្រប់គ្រង និងអភិវឌ្ឍន៍សមត្ថភាពមន្ត្រីរាជការ
-ត្រូវបន្តជំរុញ និងរឹតបន្តឹងការអនុវត្តច្បាប់ចរាចរណ៍ផ្លូវគោកឲ្យបានម៉ឺងម៉ាត់បំផុត
-ត្រូវខិតខំប្រមូលផ្ដុំធនធានដែលមានស្រាប់ និងកៀរគរការចូលរួមពីគ្រប់មជ្ឈដ្ឋាន ដើម្បីអភិវឌ្ឍន៍ស្រុកឲ្យមានការរីកចម្រើន
-ត្រូវចុះជួបផ្ទាល់ជាមួយប្រជាពលរដ្ឋឲ្យបានគ្រប់មូលដ្ឋានក្នុងស្រុក ដើម្បីធ្វើការស្វែងយល់ និងកំណត់ឲ្យបាននូវតម្រូវការ និងបញ្ហាប្រឈមនានារបស់ប្រជាពលរដ្ឋ
-ត្រូវបន្តអប់រំ ណែនាំ និងទប់ស្កាត់ប្រជាពលរដ្ឋមិនឲ្យលក់ ឬជួលដីស្រែចម្ការ ឬដីលំនៅឋាននៅតាមតំបន់ព្រំដែន ឲ្យទៅប្រជាពលរដ្ឋនៃប្រទេសជិតខាង
-ត្រូវសិក្សាស្វែងយល់ និងស្គាល់នូវភូមិសាស្ត្រ ទីតាំងបង្គោលព្រំដែន ដែលស្ថិតនៅក្នុងដែនសមត្ថកិច្ចដឹកនាំ និងគ្រប់គ្រងរបស់ខ្លួនឲ្យបានច្បាស់លាស់
-ត្រូវបន្តជំរុញ និងលើកកម្ពស់ទំនាក់ទំនង និងកិច្ចសហប្រតិបត្តិការលើវិស័យអាទិភាពនានាជាមួយស្រុកជាប់ព្រំដែន នៃប្រទេសជិតខាង ឲ្យបានល្អប្រសើរ ៕

ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញជាអធិបតីក្នុងពិធីប្រកាសចូលកាន់មុខតំណែងអភិបាល អភិបាលរង នៃគណៈអភិបាលក្រុង និងនាយករដ្ឋបាលសាលាក្រុងស្វាយរៀង

នាព្រឹកថ្ងៃពុធ ០៦រោច ខែកត្ដិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៨ ខែវិច្ឆិកា ឆ្នាំ២០១៨នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញជាអធិបតីក្នុងពិធីប្រកាសចូលកាន់មុខតំណែងអភិបាល អភិបាលរង នៃគណៈអភិបាលក្រុង និងនាយករដ្ឋបាលសាលាក្រុងស្វាយរៀង ។ ពិធីនេះរៀបចំនៅសាលប្រជុំសាលាក្រុងស្វាយរៀង ដោយមានវត្តមានអញ្ជើញចូលរួមពីសំណាក់ឯកឧត្ដមអភិបាលរងខេត្ត លោកនាយករដ្ឋបាលសាលាខេត្ត លោកមេបញ្ជាការកងរាជអាវុធហត្ថខេត្ត លោកស្នងការរងនគរបាលខេត្ត លោកមេបញ្ជាការរងតំបន់ប្រតិបត្តិការសឹករងស្វាយរៀង លោកប្រធានមន្ទីរ-អង្គភាព លោក លោកស្រីជាក្រុមប្រឹក្សាក្រុង គណៈអភិបាលក្រុង តំណាងកងកម្លាំងទាំងបី ប្រធានការិយាល័យ មន្ត្រីរាជការចំណុះសាលាក្រុងទាំងអស់ និងចៅសង្កាត់ទាំង ៧ ក្នុងក្រុងស្វាយរៀង ។

មានប្រសាសន៍ក្នុងឱកាសនោះ ឯកឧត្ដមអភិបាលខេត្ត បានសម្ដែងនូវការកោតសរសើរ និងវាយតម្លៃខ្ពស់ ចំពោះក្រុមប្រឹក្សាក្រុង គណៈអភិបាលក្រុង មន្ត្រីរាជ​កា​រគ្រប់លំដាប់ថ្នាក់ កងកម្លាំងប្រដាប់អាវុធ ប្រជាពលរដ្ឋនៅទូទាំងក្រុងស្វាយរៀង និងលោក យូ ប៊ុននី អតីតអភិបាលក្រុង ដែលទើបចូលនិវត្តន៍កាលពីពេល​​ថ្មីៗនេះ ដែលកន្លងមកបានខិតខំប្រឹងប្រែងយកអស់កម្លាំងកាយចិត្ត បំពេញតួនាទីភារកិច្ចប្រកបដោយការសាមគ្គីភាពក្នុងជួរគណៈអភិបាលក្រុង និងមន្ត្រីរាជការទាំងអស់ ធ្វើឲ្យក្រុងរបស់ខ្លួន សម្រេចបាននូវលទ្ធផលល្អប្រសើរទាំងការផ្ដល់សេវាសាធារណៈជូនប្រជាពលរដ្ឋ និងការថែរក្សាបាននូវសន្តិសុខ សុវត្ថិ​ភា​ព និងសណ្ដាប់ធ្នាប់សាធារណៈ រួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចសង្គម និងកាត់បន្ថយភាពក្រីក្ររបស់ប្រជាពលរដ្ឋ ដោយឡែកចំពោះការតែងតាំងមុខតំណែងនៅថ្ងៃនេះ គឺជាដំណើរការរដ្ឋបាលធម្មតា ក្នុងការរៀបចំមុខតំណែងមន្ត្រីរាជការក្នុងមុខងារសាធារណៈ ស្របទៅតាមគោលការណ៍គ្រប់គ្រងរបស់រដ្ឋបា​ល​ថ្នាក់ក្រោមជាតិ ច្បាប់ និងលិខិតបទដ្ឋានគតិយុត្តជាធរមាន ដោយ លោក ណុប ចំរើន ត្រូវបានតែងតាំងជាអភិបាលក្រុង លោក ជួន ចាន់ឫទ្ធី ជាអភិបាលរងក្រុង និងលោក ភឹម ថា ជានាយរដ្ឋបាលសាលាក្រុង ។

ជាមួយគ្នានេះ ឯកឧត្ដមអភិបាលខេត្ត ក៏បានផ្ដាំផ្ញើនូវកិច្ចការសំខាន់ៗមួយចំនួន ដូចខាងក្រោម ៖
-ត្រូវពង្រឹងការសាមគ្គីភាព ឯកភាពផ្ទៃក្នុង និងពង្រឹងរបៀបរបបធ្វើការងារ ដោយត្រូវចៀសឲ្យបាននូវទំនាស់ផលប្រយោជន៍ និងទំនាស់ដែលកើតចេញពីការប្រើអំណាចមិនត្រឹមត្រូវ
-ត្រូវបង្កើនការសហការក្នុងការថែរក្សាពង្រឹងសន្តិភាព ស្ថិរភាពនយោបាយ សន្តិសុខសណ្ដាប់ធ្នាប់សាធារណៈ ការបង្ការទប់ស្កាត់ និងបង្រ្កាបបទល្មើសនានា ជាពិសេសបទល្មើសគ្រឿងញៀន ចោរកម្ម និងល្បែងស៊ីសង
-គណៈអភិបាលក្រុង ត្រូវរៀបចំធ្វើការបែងចែកតួនាទី ភារកិច្ច និងការទទួលខុសត្រូវក្នុងជួរគណៈអភិបាលក្រុងឲ្យបានច្បាស់លាស់
-ត្រូវបន្តពង្រឹងការគ្រប់គ្រងការិយាល័យច្រកចេញចូលតែមួយ ឲ្យបានល្អ
-ត្រូវយកចិត្តទុកដាក់គ្រប់គ្រង និងណែនាំស្មៀនសង្កាត់ដែលស្ថិតនៅក្រោមការគ្រប់គ្រងរបស់រដ្ឋបាលក្រុង ឲ្យអនុវត្តបានត្រឹមត្រូវតាមតួនាទី ភារកិច្ចរបស់ខ្លួន
-ត្រូវពង្រឹងការគ្រប់គ្រង និងអភិវឌ្ឍន៍សមត្ថភាពមន្ត្រីរាជការ 
-ត្រូវបង្កើនការរៀបចំសណ្ដាប់ធ្នាប់ របៀបរៀបរយ បរិស្ថាន អនាម័យនៅក្នុងក្រុង ជាពិសេសនៅខាងក្នុង និងជុំវិញផ្សារវាយយន្ត នៅតាមដងផ្លូវ និងសួនច្បារសាធារណៈ ដើម្បីលើកកម្ពស់សោភ័ណភាព ជំរុញចលនាប្រឡងប្រណាំងទីក្រុងស្អាត
-ត្រូវបន្តជំរុញ និងរឹតបន្តឹងការអនុវត្តច្បាប់ចរាចរណ៍ផ្លូវគោកឲ្យបានម៉ឺងម៉ាត់បំផុត 
-ត្រូវខិតខំរួមសហការគ្នាអភិវឌ្ឍន៍ក្រុងឲ្យកាន់តែមានការរីកចម្ររើនថែមទៀត ព្រមទាំងត្រូវចុះដោះស្រាយបញ្ហា ឆ្លើយតបនឹងសេចក្ដីត្រូវការពិតប្រាកដ និងជាក់ស្ដែងរបស់ប្រជាពលរដ្ឋឲ្យបានកាន់តែល្អជាងមុន ទូលាយជាងមុន ប្រសិទ្ធភាពជាងមុន និងទទួលបានផលច្រើនជាងមុន ៕

ឯកឧត្ដម ម៉ែន វិបុល អភិបាល នៃគណៈអភិបាលខេត្ត និងជាប្រធានគណៈកម្មាធិការជំរឿនទូទៅប្រជាជនខេត្តស្វាយរៀង ឆ្នាំ២០១៩ បានអញ្ជើញជាអធិបតីក្នុងពិធីប្រកាសផ្សព្វផ្សាយគណៈកម្មាធិការជំរឿនទូទៅប្រជាជន ខេត្តស្វាយរៀង ឆ្នាំ២០១៩ ថ្នាក់ខេត្ត និងក្រុង ស្រុក

នាព្រឹកថ្ងៃចន្ទ ១២កើត ខែកត្ដិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៩ ខែវិច្ឆិកា ឆ្នាំ២០១៨នេះ  ។ ក្នុងពិធីនេះមានការអញ្ជើញចូលរួមពីឯកឧត្ដមអភិបាលរងខេត្ត លោកតំណាងវិទ្យាស្ថានជាតិស្ថិតិ នៃក្រសួងផែនការ លោកប្រធាន អនុប្រធានមន្ទីរ និងមន្ត្រីជំនាញនៃមន្ទីរផែនការខេត្ត លោក លោកស្រីប្រធានមន្ទីរ-អង្គភាពនានាក្នុងខេត្ត លោកស្នងការរងនគរបាលខេត្ត អភិបាលក្រុង ស្រុក អធិការនគរបាល មេឃុំ ចៅសង្កាត់ នាយប៉ុស្ដិ៍នគរបាលរដ្ឋបាល និងបងប្អូនម្ចាស់សណ្ឋាគារ ផ្ទះសំណាក់ សរុបចំនួន ៣២៨នាក់ ។

មានប្រសាសន៍ក្នុងឱកាសនោះ ឯកឧត្ដមអភិបាលខេត្ត បានលើកឡើងថា ជំរឿនគឺជាព្រឹត្តិការណ៍ប្រវត្តិសាស្ត្ររបស់ជាតិ ដែលអាចឲ្យយើងទទួលបានទិន្នន័យប្រជាសាស្ត្រពិតប្រាកដរបស់ប្រទេស និងជួយឲ្យរាជរដ្ឋាភិបាលអាចរៀបចំតាក់តែងគោលនយោបាយបានត្រឹមត្រូវ ព្រមទាំងការអនុវត្តកម្មវិធីផ្សេងៗ ឲ្យទទួលបានតុល្យភាព នៃការអភិវឌ្ឍសម្រាប់ប្រជាពលរដ្ឋ ហើយទិន្នន័យស្ថិតិដែលប្រមូលបានតាមរយៈការធ្វើជំរឿន នឹងក្លាយជាទិន្នន័យមូលដ្ឋានយ៉ាងសំខាន់សម្រាប់ការអភិវឌ្ឍ និងត្រួតពិនិត្យវាយតម្លៃផែនការយុទ្ធសាស្ត្រអភិវឌ្ឍន៍ ព្រមទាំងវាយតម្លៃការសម្រេចបានការអនុវត្តយុទ្ធសាស្ត្រកាត់បន្ថយភាពក្រីក្រ និងគោលដៅអភិវឌ្ឍន៍ប្រកបដោយចីរភាព ។

ជាមួយនេះ ឯកឧត្ដមបានបញ្ជាក់បន្ថែមថា នៅក្នុងឆ្នាំ២០១៩នេះ គឺជាលើកទី៤ ដែលព្រះរាជាណាចក្រកម្ពុជា បានរៀបចំជំរឿនទូទៅប្រជាជន បន្ទាប់ពីបានរៀបចំប្រកបដោយជោគជ័យ ចំនួន ៣លើករួចមក ហើយជំរឿនលើកទី៤ ដែលប្រព្រឹត្តទៅចាប់ពីថ្ងៃទី០៣-១៣ ខែមីនា ឆ្នាំ២០១៩ខាងមុខនេះ រាជរដ្ឋាភិបាលបានប្រើប្រាស់ថវិកាជាតិស្ទើរតែទាំងស្រុងសម្រាប់រៀបចំ ដែលខុសពីជំរឿនប្រជាជន ឆ្នាំ១៩៩៨ និងជំរឿនប្រជាជនឆ្នាំ២០០៨ ដែលភាគច្រើនទទួលបានជំនួយបច្ចេកទេស និងហិរញ្ញវត្ថុពីមូលនិធិប្រជាជនរបស់អង្គការសហប្រជាជាតិ (UNFPA) និងទីភ្នាក់ងារសហប្រតិបត្តិការអន្តរជាតិជប៉ុន (JICA) ដែលនេះក៏ព្រោះតែកត្តាសុខសន្តិភាព និងការអភិវឌ្ឍលើគ្រប់វិស័យ ដែលជាមនុញ្ញផលនៃនយោបាយឈ្នះ-ឈ្នះ និងការដឹកនាំប្រកបដោយគតិបណ្ឌិតរបស់សម្ដេចតេជោនាយករដ្ឋមន្ត្រី ។

ក្នុងឱកាសនោះផងដែរ ដើម្បីចូលរួមចំណែកឲ្យដំណើរការចុះធ្វើជំរឿនប្រព្រឹត្តទៅដោយរលូន ធានាបាននូវភាពសុក្រឹត្យ និងត្រឹមត្រូវ ឆ្លើយតបនឹងការចំណាយថវិកាដ៏ច្រើនសន្ធឹកសន្ធាប់របស់ជាតិ ឯកឧត្ដមអភិបាលខេត្ត ក៏បានផ្ដាំផ្ញើដល់គ្រប់សមាសភាព និងអាជ្ញាធរពាក់ព័ន្ធ ជាពិសេសមន្ត្រីអនុវត្តផ្ទាល់ត្រូវខិតខំយកចិត្តទុកដាក់សិក្សាស្វែងយល់ និងអនុវត្តតួនាទីភារកិច្ចរបស់ខ្លួនឲ្យបានត្រឹមត្រូវ ប្រកបដោយភាពម្ចាស់ការ និងការទទួលខុសត្រូវ អាជ្ញាធរមូលដ្ឋាន និងកងកម្លាំងមានសមត្ថកិច្ច ត្រូវចូលរួមសហការឲ្យបានពេញលេញនៅគ្រប់ដំណើរការ និងផ្ដល់ព័ត៌មានពាក់ព័ន្ធនានាឲ្យបានច្បាស់លាស់ និងគ្រប់ជ្រុងជ្រោយ ដើម្បីគាំទ្រដល់ដំណើរការចុះធ្វើជំរឿនជាក់ស្ដែងនៅមូលដ្ឋានក្នុងដែនសមត្ថកិច្ចរបស់ខ្លួន ត្រូវចូលរួមផ្សព្វផ្សាយអំពីការចុះធ្វើជំរឿនទូទៅប្រជាជន ឆ្នាំ២០១៩ ឲ្យបានទូលំទូលាយ និងជ្រួតជ្រាបដល់ប្រជាជនគ្រប់មូលដ្ឋានក្នុងខេត្ត និងធានាឲ្យមានការចូលរួម ផ្ដល់កិច្ចសហការពីគ្រប់មជ្ឈដ្ឋានពាក់ព័ន្ធ ដោយឡែកគណៈកម្មាធិការជំរឿនគ្រប់ថ្នាក់ និងមន្ទីរផែនការខេត្ត គួររៀបចំវគ្គបណ្ដុះបណ្ដាលមន្ត្រីអនុវត្ត ទាំងមន្ត្រីត្រួតពិនិត្យ និងមន្ត្រីសម្ភាសន៍ ធ្វើយ៉ាងណាធានាឲ្យការប្រមូលទិន្នន័យជំរឿនបានត្រឹមត្រូវ សុក្រឹត្យ និងចៀសវាងបាននូវកំហុសឆ្គងផ្សេងៗ ព្រមទាំងត្រូវមានការសហការប្រកបដោយសាមគ្គីភាព ប្រើប្រាស់ឲ្យអស់លទ្ធភាពនូវធនធានសរុប មធ្យោបាយសរុប ដើម្បីឲ្យកិច្ចការជំរឿនទូទៅប្រជាជន នៅក្នុងខេត្តស្វាយរៀង ទទួលបានលទ្ធផលជោគជ័យល្អប្រសើរតាមផែនការដែលបានគ្រោងទុក ៕

 

ឯកឧត្តម ជុំ ហាត ប្រធានក្រុមប្រឹក្សាខេត្ត និងឯកឧត្ដម រស់ ផារិទ្ធ អភិបាលរង នៃគណៈអភិបាលខេត្តស្វាយរៀង បានអញ្ជើញជាគណៈអធិបតីក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តស្វាយរៀង លើកទី៥ អាណត្តិទី២ នៅវត្តចេក សង្កាត់ចេក ក្រុងស្វាយរៀង

នាព្រឹកថ្ងៃព្រហស្បតិ៍ ៨កើត ខែកត្ដិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែវិច្ឆិកា ឆ្នាំ២០១៨នេះ រដ្ឋបាលខេត្តស្វាយរៀង បានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តស្វាយរៀង លើកទី៥ អាណត្តិទី២ នៅវត្តចេក សង្កាត់ចេក ក្រុងស្វាយរៀង ក្រោមអធិបតីភាពឯកឧត្តម ជុំ ហាត ប្រធានក្រុមប្រឹក្សាខេត្ត និងឯកឧត្ដម រស់ ផារិទ្ធ អភិបាលរង នៃគណៈអភិបាលខេត្តស្វាយរៀង ព្រមទាំងវត្តមានអញ្ជើញចូលរួមពីសំណាក់លោកជំទាវសមាជិកាក្រុមប្រឹក្សាខេត្ត ប្រធានមន្ទីរ-អង្គភាពនានា ប្រធានក្រុមប្រឹក្សា និងសមាជិកក្រុមប្រឹក្សាក្រុង គណៈអភិបាលក្រុង នាយកទីចាត់ការ/ប្រធានអង្គភាពចំណុះសាលាខេត្ត តំណាងកងកម្លាំង ប្រធានការិយាល័យជំនាញនានាជុំវិញស្រុក លោក លោកស្រី ប្រធាន និងសមាជិកក្រុមប្រឹក្សាសង្កាត់ អង្គការសង្គមស៊ីវិល ព្រមទាំងប្រជាពលរដ្ឋនៅក្នុងក្រុងស្វាយរៀង ប្រមាណ ៣០០នាក់ ដោយផ្ដោតលើប្រធានបទសំខាន់ៗមួយចំនួន ដូចជា ១.ការអនុវត្តគោលនយោបាយភូមិ ឃុំ មានសុវត្ថិភាព ២.ការផ្ដល់សេវាសាធារណៈ ៣.ការធ្វើអត្តសញ្ញាណប័ណ្ណ ការងារអត្រានុកូលដ្ឋាន បរិស្ថាន អនាម័យ បទល្មើសនេសាទ ជនអន្តោប្រវេសន៍ និងទំនាស់ដីធ្លី ៕

អត្ថបទ​ផ្សេងៗ​ទៀត...

  1. រដ្ឋបាលខេត្តស្វាយរៀង បានរៀបចំពិធីប្រកាសចូលកាន់មុខតំណែងអភិបាលរង នៃគណៈអភិបាលខេត្តស្វាយរៀង និងអភិបាល នៃគណៈអភិបាលស្រុកកំពង់រោទិ៍
  2. ឯកឧត្តមអ៊ុយ​​​ ថន​​​​​​ សមាជិកក្រុមប្រឹក្សាខេត្ត​​ លោកជំទាវឯក​ សុវណ្ណភារៈ អភិបាលរង​ នៃគណៈអភិបាលខេត្តស្វាយរៀង បានអញ្ជើញជាគណៈអធិបតីវេទិក្នុងការផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តស្វាយរៀង នៅវត្តស្វាយជ្រំ ស្រុកស្វាយជ្រំ
  3. ឯកឧត្តម ហែម ពិសិដ្ឋ អញ្ជើញជាអធិបតីក្នុងពិធីបើកសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិល(២០១៩-២០២១)​នៅសាលាស្រុកស្វាយជ្រំ ខេត្តស្វាយរៀេង
  4. ឯកឧត្ដម រស់ ផារិទ្ធ អភិបាលរង នៃគណៈអភិបាលខេត្តស្វាយរៀងអញ្ជើញជាអធិបតីក្នុងពិធីសិក្ខាសាលាសមាហរណកម្មកម្មវិធីវិនិយោគបីឆ្នាំរំកិល(២០១៩-២០២១) នៅថ្នាក់ស្រុក ឆ្នាំ២០១៨នៅស្រុកកំពង់រោទិ៍

ព័ត៌មានថ្មីៗ

យុទ្ធសាស្ត្រចតុកោណ(ដ៣)

ចំនួនអ្នកទស្សនា

ថ្ងៃនេះ 0

ម្សិលមិញ 4

សប្តាហ៍ 4

ខែ 140

សរុប 9135