ប្រព័ន្ធស្ថិតិអត្រានុកូលដ្ឋាន

បណ្ណាល័យ គ.ជ.អ.ប

ក្រុមការងារសាខាកាកបាទក្រហមកម្ពុជាខេត្តស្វាយរៀង បាននាំយកអំណោយមនុស្សធម៌ជូនប្រជាពលរដ្ឋ នៅស្រុកស្វាយទាប

នាព្រឹកថ្ងៃពុធ ១០ រោច ខែមិគសិរ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៣ ខែធ្នូ គ.ស២០១៧នេះ ក្រុមការងារសាខាកាកបាទក្រហមកម្ពុជាខេត្តស្វាយរៀង ដឹកនាំដោយលោកជំទាវ ពៅ សុភាព អភិបាលរង នៃគណៈអភិបាលខេត្តស្វាយរៀង និងជាហេរញ្ញឹកគណៈកម្មាធិការសាខាកាកបាទក្រហមកម្ពុជាខេត្ត ព្រមទាំងក្រុមប្រតិបត្តិសាខា មន្ត្រីអនុសាខាកាកបាទក្រហមកម្ពុជាស្រុកស្វាយទាប បាននាំយកអំណោយមនុស្សធម៌ ចែកជូន ចាស់ជរា ១៧ គ្រួសារ ជនពិការ ២នាក់ និងគ្រួសារមានជីវភាពខ្វះខាត ៣៦គ្រួសារ សរុប ៥៥ គ្រួសារ មកពី ៣ ឃុំក្នុងស្រុកស្វាយទាបគឺឃុំ កណ្តៀងរាយ ២២ គ្រួសារ ឃុំប្រសូត្រ ១៦ គ្រួសារ និងឃុំសំបួរ ១៧ គ្រួសារ ។

ក្នុងឱកាសនោះ លោកជំទាវ បានផ្ដាំផ្ញើដល់បងប្អូនប្រជាពលរដ្ឋទាំងអស់យកឲ្យចិត្តទុកដាក់ពីសុខភាព រក្សាឲ្យបាននូវអនាម័យទាំងការរស់នៅ និងការហូបចុក ដើម្បីចៀសវាងពីជំងឺដង្កាត់ផ្សេងៗមកបៀតបៀន ព្រមទាំងសូមឲ្យបងប្អូនដែលរស់នៅមូលដ្ឋានជាមួយគ្នា ត្រូវមានការសាមគ្គីគ្នា ចេះជួយទុក្ខធុរៈគ្នាទៅវិញទៅមក និងចៀសវាងឲ្យឆ្ងាយពីអំពើអសកម្មនានាដែលសង្គមជាតិស្អប់ខ្ពើម ចៀសវាងឲ្យឆ្ងាយពីគ្រឿងញៀន ត្រូវគោរពច្បាប់ចរាចរណ៍ ដើម្បីឲ្យភូមិ សង្កាត់យើងមានសុវត្ថិភាព និងរស់នៅប្រកបដោយភាពសុខដុមរមនា ។

ស្បៀង និងសម្ភារដែលបានចែកជូនទាំង ៥៥ គ្រួសារ ក្នុង ១គ្រួសារទទួលបាន អង្ករ ៣០គក្រ កន្ទេល ១ ត្រីខ ១០កំប៉ុង ទឹកស៊ីអ៊ីវ ៦ដប មី ១កេស មុង ១ ភួយ ១ ក្រម៉ា ១ សារុង ១ ថវិកា ៤០.០០០រៀល ៕

វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តស្វាយរៀង ឆ្នាំទី០៤ អាណត្តិទី២ នៅសាលាស្រុករំដួល

នាព្រឹកថ្ងៃអង្គារ ៩រោច ខែមិគសិរ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១២ ខែធ្នូ គ.ស ២០១៧នេះ នៅសាលាស្រុករំដួល មានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តស្វាយរៀង ឆ្នាំទី០៤ អាណត្តិទី២ ក្រោមអធិបតីភាព ឯកឧត្តមបណ្ឌិត គឹម ធា ប្រធានក្រុមប្រឹក្សាខេត្ត និងឯកឧត្តម ហែម ពិសិដ្ឋ អភិបាលរង នៃគណៈអភិបាលខេត្តស្វាយរៀង តំណាងឯកឧត្តម ម៉ែន វិបុល អភិបាល នៃគណៈអភិបាលខេត្ត ។

សមាសភាពអញ្ជើញចូលរួមក្នុងវេទិកានេះរួមមាន ឯកឧត្តមសមាជិកក្រុមប្រឹក្សាខេត្ត លោកស្រីនាយករងរដ្ឋបាលសាលាខេត្ត តំណាងកងកម្លាំងទាំងបី លោក លោកស្រី ប្រធាន អនុប្រធានមន្ទីរ និងអង្គភាពនានាជុំវិញខេត្ត លោក លោកស្រីនាយកទីចាត់ការ និងប្រធានអង្គភាពលទ្ធកម្មចំណុះសាលាខេត្ត លោកប្រធានក្រុមប្រឹក្សា លោក លោកស្រីសមាជិកក្រុមប្រឹក្សាស្រុក លោកអភិបាលស្រុក លោក លោកស្រីអភិបាលរងស្រុក លោកនាយក នាយករងរដ្ឋបាលសាលាស្រុក លោក លោកស្រីប្រធាន អនុប្រធានការិយាល័យ និងអង្គភាពលទ្ធកម្មចំណុះសាលាស្រុក និងការិយាល័យជំនាញនានាជុំវិញស្រុក លោក លោកស្រីមេឃុំ ជំទប់ ស្មៀនឃុំ លោកនាយប៉ុស្តិ៍នគរបាលរដ្ឋបាល លោកនាយក នាយិកាទាំងអស់ក្នុងស្រុក និងបងប្អូនប្រជាពលរដ្ឋយ៉ាងច្រើនកុះករ ។

សូមបញ្ជាក់ថា ប្រធានបទសំខាន់ៗដែលបានលើកយកមកពិភាក្សានៅក្នុងអង្គវេទិកានៅថ្ងៃនេះ មានដូចជា ៖ 
១.ការអនុវត្តគោលនយោបាយភូមិ ឃុំ មានសុវត្ថិភាព 
២.ការងារអភិវឌ្ឍន៍មូលដ្ឋាន ការផ្ដល់សេវាសាធារណៈ 
៣.ការធ្វើអត្តសញ្ញាណប័ណ្ណ ការចុះសំបុត្រអត្រានុកូលដ្ឋាន សុខភាពអនាម័យ ការងារដីធ្លី ការងារបរិស្ថាន អគ្គិសនី និងការបោះបង់ការសិក្សា ៕

កិច្ចប្រជុំត្រួតពិនិត្យ សភាពការណ៍ កិច្ចប្រតិបត្តិការណ៍ បង្ការទប់ស្កាត់បង្ក្រាបបទល្មើសគ្រឿងញៀន

នារសៀលថ្ងៃចន្ទ ៨រោច ខែមិគសិរ ព.ស ២៥៦១ ត្រូវនឹងថ្ងៃទី១១ ខែធ្នូ គ.ស ២០១៧នេះ ឯកឧត្តម តូច ប៉ូលីវ៉ា អភិបាលរង នៃគណៈអភិបាលខេត្តស្វាយរៀង តំណាងឯកឧត្តម ម៉ែន វិបុល អភិបាល នៃគណៈអភិបាលខេត្ត បានចូលរួមជាមួយឯកឧត្តមនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន អញ្ជើញជាអធិបតីក្នុងកិច្ចប្រជុំត្រួតពិនិត្យ សភាពការណ៍ កិច្ចប្រតិបត្តិការណ៍ បង្ការទប់ស្កាត់បង្ក្រាបបទល្មើសគ្រឿងញៀន ដែលរៀបចំនៅសាលប្រជុំស្នងការដ្ឋាននគរបាលខេត្ត ។

ក្នុងកិច្ចប្រជុំនេះមានការអញ្ជើញចូលរួមពីឯកឧត្តម លោកគណ:ប្រតិភូអគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន លោក គង់ ច័ន្ទខេមរិទ្ធ ព្រះរាជអាជ្ញាអមសាលាដំបូងខេត្ត លោកឧត្តមសេនីយ៍ទោ កឹង ឃន ស្នងការនគរបាលខេត្ត ព្រមទាំងមានការអញ្ជើញចូលរួមពីលោក លោកស្រី ឧត្តមសេនីយ៍ វរសេនីយ៍ស្នងការរង លោក អនុប្រធានសេនាធិការ លោកអនុប្រធានការិយាល័យកណ្តាល នាយ នាយរងការិយាល័យជំនាញ ចំណុះស្នងការដ្ឋាននគរបាលខេត្ត លោកមេបញ្ជាការវរសេនាតូច និង នាយប៉ុស្តិ៍នគរបាលការពារព្រំដែន លោកអធិការ អធិការរង និងនាយផ្នែកគ្រឿងញៀន នៃអធិការដ្ឋាននគរបាលក្រុង ស្រុក លោក លោកស្រីនាយប៉ុស្តិ៍នគរបាលរដ្ឋបាលឃុំ សង្កាត់ និងលោកនាយប៉ុស្តិ៍នគរបាលច្រកទ្វារព្រំដែនទ្វេភាគី សរុបវត្តមាន ៣១៨ នាក់ ៕

សិក្ខាសាលាអន្តរជំនឿ-សាសនា ស្តីពីការចូលរួមទាំងអស់គ្នាដើម្បីឲ្យជីវិត និងសហគមន៍យើងគ្មានគ្រឿងញៀន

នាព្រឹកថ្ងៃចន្ទ ៨រោច ខែមិគសិរ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១១ ខែធ្នូ គ.ស២០១៧នេះ ឯកឧត្តម ហែម ពិសិដ្ឋ អភិបាលរង នៃគណៈអភិបាលខេត្តស្វាយរៀង តំណាងឯកឧត្តម ម៉ែន វិបុល អភិបាល នៃគណៈអភិបាលខេត្ត បានអញ្ជើញចូលរួមសិក្ខាសាលាអន្តរជំនឿ-សាសនា ស្តីពីការចូលរួមទាំងអស់គ្នាដើម្បីឲ្យជីវិត និងសហគមន៍យើងគ្មានគ្រឿងញៀន នៅសាលប្រជុំសណ្ឋាគារវ៉ៃគោ ក្រុងស្វាយរៀង ក្រោមអធិបតីភាពឯកឧត្តម ហ៊ឹម ឆែម ទេសរដ្ឋមន្ត្រី រដ្ឋមន្ត្រីក្រសួងធម្មការ និងសាសនា និងមានសិក្ខាកាមនិមន្ត-អញ្ជើញចូលរួមមកពីសាសនាចម្រុះ រួមមាន ព្រះពុទ្ធសាសនា គ្រឹស្តសាសនា ឥស្លាមសាសនា សាសនាមហាយាន និងសាសនាបាហៃ ដែលមានព្រះសង្ឃ ចំនួន ៦០អង្គ និងគ្រហស្តចំនួន ១៤៥នាក់ ស្រី ១៥នាក់។

ដំណើរការអង្គសិក្ខាសាលានេះ នឹងប្រព្រឹត្តទៅរយៈពេលពេញមួយថ្ងៃ ក្នុងគោលបំណងផ្សព្វផ្សាយវប្បធម៌កិច្ចសន្ទនាអន្តរសាសនាដើម្បីគាំទ្រការប្រយុទ្ធប្រឆាំងគ្រឿងញៀននៅព្រះរាជាណាចក្រកម្ពុជា គាំទ្រផែនការយុទ្ធសាស្រ្តនិង កម្មវិធីសុខដុមនីកម្មសាសនារបស់ក្រសួងធម្មការ និង សាសនា និងពង្រឹងកិច្ចសហប្រតិបត្តិការអន្តរសាសនា នៅព្រះរាជាណាចក្រកម្ពុជា ដោយមានការជួយឧបត្ថម្ភពីអង្គការ Danmission ៕

 

ព័ត៌មានថ្មីៗ

យុទ្ធសាស្ត្រចតុកោណ(ដ៣)

ចំនួនអ្នកទស្សនា

ថ្ងៃនេះ 4

ម្សិលមិញ 2

សប្តាហ៍ 21

ខែ 84

សរុប 5551